NASKAH FILM SI KABAYAN

SI KABAYAN SALINGKUH 

Ku : Gun Gun Nugraha

 

INT. BURUAN SANGGAR

(UPACARA PEMBARETAN HANSIP. PAKAINNA SI KABAYAN : SAPATU, KOLOR, KAMEJA, JEUNG IKET) SHOT SIKABAYAN TI HANDAP NEPIKA LUHUR)

 

KOMANDAN:

Sarariap gerak !Risman ka hareup! Maneh jadi porotongkol !

RISMAN:

Ijin, komandan! Sanes porotongkol, tapi protokol.

(KABAYAN NGALIEUK KA RISMAN)

KOMANDAN:

Sok tahu, maneh! Mapatahan ngojay kameri. Push-Up !

(KABAYAN NYENGIR)

RISMAN:

Siap ! (KUKULUTUS NGAHAREWOS KA SI KABAYAN)Kaduhung ngabejaan. Apal kieu mah, teu hayang !

KABAYAN :

Matak uing repeh oge titadi, bisi salah ngomong ! Ha..ha..ha

KOMANDAN :

Ngaromong naon maraneh ?!

RISMAN :

Komandan asa beuki kasep ayeuna mah, kitu !

KOMANDAN :

Ha...ha..ha (NGOME NGOME BUUK). Dewek tea atuh ! Ha..ha..ha..!

RISMAN :

Ijin komandan ! Abdi kedah Phus-up wae ieu teh ! Pan tos dipuji ku abdi tadi.

KOMANDAN:

Push-up wayahna ! Hukuman teu bisa dibeuli ku pujian !

 

RISMAN :

Siap, komandan !

(SHOT RISMAN KEUR Push-up)

Komandan :

Denok kadieu ! Daripada maneh ngadeluk, jadi porotongkol nya !

(SHOT DENOK NU KEUR NGADELUK)

                            DENOK:

(GOGODEG BARI SEURI) mangga, komandan !

KOMANDAN :

Langsung wae omongkeun, maksud sayah ngumpulkeun barudak dina poe ayeuna. Bebas ngomongna mah kumaha maneh !

DENOK :

Mangga komandan ! Ayeuna poe Minggu,tanggal 28 Juni 2020, komandan rek nyerahkeun jabatanna ka sodarah Kabayan alias bapa abdi. Sakaligus ngawariskeun seragam Hansipna.Sakitu heula!

KOMANDAN :

(NGALAAN PAKEANNANA,NYESA KOLOR JEUNG KAOS OBLONG, SHOT KOMANDAN TI HANDAP NEPIKA LUHUR)Kabayan ! Ieu pake seragam kumaneh ! Jeung sakalian sayah rek  nyerahkeun jabatan komandan ! Sing amanah ! Kuring geus bosen jadi komandan, rek balik deui jadi anggota ayeuna mah ! Lieur jeung cape jadi pamingpin teh. (BARI NYERAHKEUN SERAGAM HANSIP KA SI KABAYAN)

KABAYAN :

Hehe..he..ditampi ieu amanat jabatan sareng seragamna, pa ! Nuhun, Pa !

KOMANDAN:

Sami-sami, Kabayan ! (BARI NGARANGKUL SI KABAYAN, MUSIK SEDIH)

SI KABAYAN :

(KEUR DIRANGKUL PAUNGKU-UNGKU SI KABAYAN HITUT : SHOT BUJUR SI KABAYAN)

KOMANDAN :

Sora naon eta ?! (UNGAS-INGUS BARI NGALEUPASKEUN RANGKULANANA))

KABAYAN :

Hehe..he Abdi hitut sakedik, komandan ! Punten, teu kiat titadi ditahan !

KOMANDAN :

Gelo, siah ! Teu sopan ! (KOMANDAN AMBEK BARI NYIDUH) Nonggeng siah, dibabet siah bujur teh, teu gableg cedo !

KABAYAN :

(SERAGAM KOMANDAN DITUNDA GIGIREUNANA,KABAYAN NYUUH KANA SUKU KOMANDAN)

KABAYAN :

Duuuh ! Punten komandan, kaceplosan ! Teu kaampet! (NYEKELAN SUKU KOMANDAN, KOMANDAN REK NGALENGKAH HESEEUN TEPIKA LABUHNA. SI KABAYAN NGORONDANG, LUMPAT DIBERIK KU KOMANDAN BARI MAWA PANEUNGGEUL)

 

 

EXT. DEPAN RUMAH MEWAH

SI KABAYAN KALUAR TI IMAH GEDONG. AJUDAN JEUNG RISMAN NGAJEGA NUNGGUAN HAREUPEUN MOTOR BUTUT. 

SI KABAYAN :

Bunda, Sayang ! Ayah bade dines heula !

ITEUNG :

Mangga, yah ! Jaga diri ayah baik-baik ! Bunda cayang, ayah ! Awas ulah nyengos ka istri sanes nya !

SI KABAYAN :

Moal atuh, bun ! Sing percanten ka Ayah ! di hati ayah hanya ada bunda seorang ! Bunda cayang ka Ayah ! Ayah oge cayang ka bunda ! Jadi pacayang-cayang ! Hehehe..he.

(SHOT : AJUDAN JEUNG RISMAN KEUR SILIH RERET)

ITEUNG :

Hehehe.. Makasih, yah ! (SEDIH, MELUK SI KABAYAN, KU SI KABAYAN DIUSAPAN RAMBUTNA) Apalagi ayah sekarang tos janten komandan Hansip ! Cita-cita urang teh tos ngawitan laksana, yah ! Tapi omat! Ayah ulah kagoda ku istri sanes nya ?!Bunda hariwang ! Margi raray ayah mah, katawisna raray cengos.

(SHOT : AJUDAN JEUNG RISMAN NU HAHAREWOSAN)

Si KABAYAN :

(NYENGKATKEUN AWAK SI ITEUNG )Bunda, bunda ! Cobi beulah hate ayah ! Sok sanaos raray ayah cengos ! Hate ayah mah, tetep anjeun nu dipikacinta ! Kita akan hidup semati, ya sayang?!

ITEUNG :

Bunda bahagiaa... pisan nguping ayah nyarios kitu !

SI KABAYAN :

Okeh ! Ayah berangkat heula nya ! (NGASONGKEUN PANANGAN)

SI ITEUNG :

Mangga, yah ! Hati-hati di jalan. (NAMPANAN LEUNGEUN KABAYAN)

SI KABAYAN :

Dadah Iteung sayang !

ITEUNG :

Dadah, ayangku Kabayan !(ITEUNG DADAH KA KABAYAN)

KABAYAN :

Ajudan ! Sayah akod rek naek kana motor !

(AJUDAN SILIH RERET JEUNG RISMAN)

AJUDAN :

Siap ! Komandan ! (BARI NGAGANDONG SI KABAYAN, DIDIUKEUN KANA MOTOR).

AJUDAN :

Punten Komandan, muntang !!

(SI KABAYAN BURU BURU MUNTANG KANA DAHAN KAI/PAGER. MOTOR NYOLOYONG MAJU)

KOMANDAN :

Hei Ajudan !! Sayah tinggaleun.

AJUDAN:

Astagfirullah ! Apan saur abdi oge tadi muntang !

SI KABAYAN :

Muntang ! Muntang we! sing jelas atuh ngomong teh, muntang kana cangkeng kituh!

AJUDAN + RISMAN :

Wios Komandan, abdi nu lepat !

 

INT. JALAN

KABAYAN TURUN TINA MOTOR NGAGUPAYAN AJUDAN.

KABAYAN :

Ajudan, sayah punggu sing luhur,  rek nelpon Gubernur. Sayah hayang naek gajih. Sugan we bulan hareup mah gajih Hansip teh naek jadi sapuluh juta. Supaya teu diledek batur.

AJUDAN :

Siap laksanakan ! (BARI NGAHORMAT, SI KABAYAN DIPUNGGU, SHOT : BEUNGEUT AJUDAN NU BEBETEN, BEURAT)

 

SI KABAYAN :

Hallo! Hallo ! Muhun, muhun! Siap ! Siap ! ( KEUR KITU AYA LASTRI, BUDAK SMA NGALIWAT. SI KABAYAN MENCRONG. BARI KUMETAP. SHOT : LASTRI KEUR LEUMPANG)Ajudan turunkeun heula sayah !

AJUDAN :

Siap, komandan ! Aya naon ?!

KOMANDAN :

Aya budak awewe,euy ! Meni cikruh kitu !(KUMETAP BARI NUNJUK)

AJUDAN :

Waduh ! sanes cikruh deui eta mah, pulen !Hehehe..he

RISMAN :

Istri cikruh dimana, Dan ?!

KOMANDAN :

Kepo !

(RISMAN GOGODEG)

KOMANDAN :

Dagoan maraneh di dieu ! Urang ketrek ku sayah !

AJUDAN + RISMAN :

Siap, komandan ! Abdi ikhlas janten kambing conge !

KOMANDAN :

Bagus ! Bagus !

EXT. JALAN

KABAYAN :

(SHOOT : KABAYAN NGADEUKEUTAN LASTRI BARI SURUNGAH SERENGEH,GUMASEP. SHOT : LASTRI KEUR SEURI ERA )

Wios Aa kenalan neng !

LASTRI:

Wios! (NGOME-NGOME TUNGTUNG BAJU)

KABAYAN :

Nepangkeun ! wasta Aa : Kabayan, komandan Hansip di ieu daerah  ! (NYOLONGKRONG SASALAMAN )

LASTRI :

Abdi Lastri, Linggih di Kebon Muncang.

KABAYAN :

Hehehe..he gaduh nomber WA ?!

LASTRI :

Gaduh A !

KABAYAN :

Tiasa, Aa nyungkeun ?!

LASTRI :

Mangga ! Ieu A, nomberna !

(LONG SHOT KABAYAN JEUNG LASTRI KEUR NGOBROL)

 

EXT. JALAN

ABAH NGINTIP SI KABAYAN NU KEUR NGOBROL JEUNG LASTRI.

 

ABAH:

Kurang ajar Si Kabayan ! Dasar minantu pikasebeleun ! Kudu buru-buru dibejakeun ieu mah ka Si Iteung !

(ABAH LEUMPANG GAGANCANGAN)

 

EXT. BURUAN IMAH

AMBU, ITEUNG, JEUNG DENOK KEUR SILIH SIARAN.

ABAH :

Iteung ! Iteung ! Tinggali tuh Si Borokokok, pikasebeleun !

(AMBU, ITEUNG, JEUNG DENOK CURINGHAK)

AMBU :

Aya naon, Abah ?! Datang-datang ujug-ujug nambek kitu !

ABAH :

Naon, naon weh ! Tuh, tinggali Si Kabayansalingkuh !

AMBU :

Si Kabayan salingkuh ?!

ABAH :

Bener Ambu !

ITEUNG :

Nu leres, abah nyarios teh ?!

 

ABAH :

Piraku maneh teu percaya kana iman abah, Iteung ?!

DENOK :

Abah, punten urang ngobrol paduduan sareng denok !

(NGENYANG LEUNGEUN SI ABAH DIBAWA KATEMPAT JAUH)

DENOK :

Abah teu kenging seueur fitnah ka bapa abdi teh !

ABAH :

Lain fitnah, Denok ! Faktana ieu mah, bapa maneh  teh memang purunyus !

DENOK :

Abdi teu percanten, bah. Margi ti kapungkur oge, abah mah hurik ati belang bayah ka si Bapa teh.

ABAH :
Denok ! Wani ngomong kitu ka abah ?! Ari maneh diurus teh ku saha ?!

DENOK :

Ku amih sareng ku bapa, emang Abah ngurus abdi ?! Enggak kan?! We....! (NGAJEBENGAN SI ABAH)

ABAH :

Dasar ! Bapana pikasebeleun, anakna oge kucrut !

 

DENOK :

Punten, bah. Pami abdi kucrut, abah oge gehel panginten. Margi abdi teh incu, abah !

ABAH :

Uluuuuh ! Tepika kituna nya, anak-anakan Si Kabayan, heuheuh incu aing (MALENGOS)

DENOK :

Kieu wae abah ! Pami leres bapa abdi salingkuh. Wantun henteu, bujur abah janten hideung jiga bujur katel anu si Ambu ?!

ABAH :

Wani abah mah, sok ! Ayeuna mah urang tinggali babarengan kaditu. Tinggali ku sorangan, supaya maneh percaya ka abah.

 

DENOK :

Mangga atuh pami kitu mah ! Amih ! Ambu ! hayu ngiring, urang ngabuktoskon cariosan Si Abah ! Bilih wadul !

(DENOK, AMBU, ITEUNG, JEUNG SI ABAH NGABRING, LALEUMPANG GANCANG KA JALAN, TEMPAT SI KABAYAN BOBOGOHAN)

 

EXT. JALAN

SI KABAYAN JEUNG LASTRI KEUR PACEKEL-CEKEL LEUNGEUN, TULUY LULUMPATAN (JIGA DINA FILM INDIA).

ABAH, ITEUNG, AMBU, JEUNG DENOK NINGGALIKEUN TI KAJAUHAN. ABAH JEUNG AMBU KEKEROT NAHAN AMARAH, SI ITEUNG CEURIK, SI DENOK MAH TENANG.

ABAH :

Tuh, Iteung !! Kitu kalakuan salaki maneh teh !

ITEUNG :

Muhun, bah ! Ayeuna mah abdi percanten ka abah ! (CEURIK BARI NGARANGKUL SI AMBU)

AMBU :

Teu nyangka nya, kalakuan Si Kabayan tepika kitu !Sabar Iteung anak ambu (AMBU GOGODEG, NGUSAPAN RAMBUT SI ITEUNG)

 

DENOK :

Ulah waka percanten, amih ! Mungkin wae Si Bapa teh, nuju latihan tari India !

ABAH :

Denok !!! Can keneh percaya maneh teh ! Geus ninggali ku panon sorangan oge ?!

DENOK :

Sorry ! Aku orangnya tidak gampang percaya begitu saja !

ABAH :

Dasar !!! Anak buaya !

DENOK :

Pami abdi anak buaya ?! Berarti abah oge Kudanil !

ABAH !

Benerrrrr !!!! Pusing, ah! Kudu dikitukeun budak gehel kieu mah !

 

EXT. JALAN

KABAYAN NGOBROL JEUNG LASTRI, SI ITEUNG CEURIK LUMPAT TIBUBURANJAT NYAMPEURKEUN SI KABAYAN.

ITEUNG :

Kang Kabayan !!! Kang Kabayan !! (LUMPAT REK NYAMPEURKEUN. SI KABAYAN JEUNG LASTRI REUWAS.

LASTRI :

Eta saha, Aa ?! (GEUMPEUR)

KABAYAN :

Duka, Lastri ! Biasa..! apan Aa mah seueur penggemar, seueur istri nu resepen hehehe. Buru urang indit kana motor (KABAYAN NGABETOT LASTRI. NAEK KANA MOTOR, MOTOR NGOLOYONG DIUNGTUNGTUNG KU AJUDAN JEUNG RISMAN, NINGGALKEUN SI ITEUNG NU JEJERITAN. SI ITEUNG DEKU, NYEGRUK CEURIK DI TENGAH JALAN. SHOT : ABAH, AMBU, JEUNG DENOK NYAMPEURKEUN SI ITEUNG)

 

        ------------------BERSAMBUNG---------------------

                                        Cisewu, 26 Juni 20